BIOGRAFÍA

Nadia Sniba medra nunha familia cunha forte tradición musical e inicia a súa aprendizaxe nas aulas. O seu paso por Lisboa marca un punto de inflexión no seu percorrido: o contacto cunha cidade atravesada por múltiples culturas e linguaxes musicais abre unha etapa de descubrimento e experimentación que define a súa maneira de entender a creación.

Multiinstrumentista, compositora e produtora, aborda a música dende unha perspectiva integral, implicándose nas distintas fases do proceso creativo. O estudo de gravación convértese no seu espazo de exploración, onde traballa coas texturas e as atmosferas para atopar novas formas de diálogo entre o acústico e outras sonoridades.

No seu percorrido figuran experiencias como as Residencias Artísticas de Mariñán 2025 e a Residencia Paco de Lucía, espazos de creación que acompañan o desenvolvemento da súa identidade musical.

NANU constrúe cancións dende a raíz, pero coa mirada posta no que aínda está por descubrir.